日本Sim卡懶人包(2024)

0 242,411

Sim 卡基礎

香港可以買到既日本Sim 卡有好多種.  主要係分香港漫遊卡, 同日本本地卡兩大類.  呢d sim 卡由$70 ~ $250 不等.  貴唔一定係最好, 不過平嘅好多長期得 1Mbps 唔夠既速度. 日本本地卡係一定反應快ping time 低, 出日本IP , 價錢亦較高.  香港漫遊卡就你去到日本都係用緊香港IP.  兜一圈先出internet.

不過係講邊隻得之前, 你首先要明白, 唔係直播睇片先需要一張有合理正常速度既sim 卡.  因為:

1. 你開google map 定位, load 個map , 全部都要用data 同網路.  你sim 速度越慢, ping time 越高,  你定位亦一定越慢越唔準.

2. 係日本會開網站格下價, 睇下香港平d 定日本平, 如果得1Mbps 既速度, 係你平時香港用既 1/30 既速度.  好明顯太低速係唔掂.

3. 用whatsapp 既電話語音功能既話, 要穩定咁講到個whatsapp voice call,  係需要2Mbps  以上速度.

4. 因為速度低, 所以亦會影響到你就算有signal 都好似接收唔到咁, 篤極都唔郁.

重點係, 慳錢係應該.  不過太平買完張卡番黎, 去到用唔到或者要用佢個陣就慢到嘔既話, 你係無慳到錢, 你係倒左幾十蚊落海, 因為你俾左錢用唔到.  所以一張sim 卡, 係普通用google map, 覆whatsapp, 上facebook, 合理既速度係應該要有3Mbps 或以上.    等你有個比較, 香港我地用開既4G 服務, 係30Mbps 以上.   而5G 係80Mbps 以上.

所以, 係本站既speedtest, 如果圖既 download speed 係有10Mbps 或以上既話, 會係叫合理正常.  高過20Mbps 係會叫快.  快過30Mbps 會叫高速.

 

有關Speedtest

睇speed test 係需要睇晒download speed, upload speed, 同ping time. 佢地代表3樣唔同嘅野.

Download speed = 當你手機有反應個陣, 佢需要幾耐時間下載個網頁/video, 越高越快. 睇片1080P 係需要約 10Mb+ 嘅速度.

Upload speed = 當你手機有反應個陣, 佢需要幾耐時間去上傳相片, 回覆message. 越高就send 相俾人越快. 開live 俾fd 睇係需要較高嘅upload speed, 最好有 10-20Mbs 以上. 你唔係開live 嘅話, 正常 5-10mb/s 係好夠用.

ping time = 係決定你部手機要發呆幾多秒先開始有反應去download 或upload. 亦同時決定你定位有幾準確同更新定位有幾快. 自駕遊對ping 有較高要求. 最理想係50ms 以下就做到本地人嘅速度. 過左130ms 已經叫慢. 200ms 以上你會明顯感到lag 機. 300ms 以上嘅你會有機會好多時部機無左反應.  Ping time 其實比download/upload speed 更為重要. (as long as download/upload speed 過左最低要求嘅速度)

 

過往嘅人著重睇download speed, 原因係個陣你根本無得揀, 太多垃圾sim.  2024年嘅今日有5G, 大部份卡都應該最少有3Mbs – 100mbs 嘅download 速度.  咁你就要睇埋upload 同ping time 呢2個數值.

 

選購sim 卡資訊

市面上有好多人都話Docomo 卡.   其實Docomo 只係個網路, 即係CSL 咁樣.  等同你係香港買好多唔同牌子嘅sim 卡都會用到CSL 個網路.  不過唔代表張卡有CSL 親生仔台卡咁快囉.  係日本, 好多唔同牌子嘅sim 都有用Docomo 呢個網路,  每個牌子就算網路都係Docomo 都有分別.  所以有人話Docomo 好快, 有人話Docomo 好慢就係咁解, 因為佢地買既係唔同價錢唔同牌子既卡黎.

每個牌子既Docomo 卡, 速度係可以好大好大分別.  買個陣可以留意以下幾點就中少d 伏.

1.  聲稱”無限數據, 不降速” 既卡.  死梗.  呢d 全部瑣係1Mbps .   太多聲稱係無限數據既, 其實係瑣速.   基本上見到”不降速” 呢3隻字就應該放番低, 佢”不降速”係因為慢到無得再降.  好多人買過呢d”不降速” 既卡中伏.  2024年香港係買唔到真正嘅日本無限數據5G 卡嘅, 唔好再搵無限sim 卡啦, 係無呢樣野嘅.

2.  要平既話買d 10GB 嘅8日卡.  即係寫明FUP (公平使用原則) 用完5G速度既10GB 後會降速到3G 速度.  有限數據既反而速度會正常好多.  正常你香港用5GB data 一個月嘅話, 你去日本8日預用double 10GB 就差唔多.

3.  好多卡係會寫住10GB 嘅8日無限卡既, 後面多左”無限” 兩個字. 其實同 point 2 講緊既卡係一模一樣.  佢係講緊頭10GB 係4G/5G 速度, 你用曬頭10GB, 就跌落極慢既3G 128kbps 速度.  3G速度唔會用到google map 唔會用到youtube, 唔會上到網頁.  只夠你用文字whatsapp send 短信.  你可以當作係用唔到架啦當跌左落3G 速度的話.

4.   真無限4G 速度既卡, 係封面唔會寫住有幾多GB 數.  亦唔會寫住不降速呢d 字.  2018年個陣價錢最少$250蚊一張起跳. 我所知既香港真4G/5G 速度無限卡, 2024年係完全無見過.  而多data 嘅選擇, 99% 係得日本機場攞嘅Wifi 蛋.  (20GB – 150GB+)

5. 封面見到寫住 “無限data” ,  “不降速” ,  “封面係富士山做背景” ,  “無寫FUP 係封面或背面 佢真正可以用幾多4G/5G data 先會降速”, 呢d 卡通常都好大伏味.

6. 呢個世界好公平, 大廠大品牌或親生仔出嘅貴卡通常穩陣過不知名嘅sim 好多.  價錢貴嘅日本機場攞嘅Wifi 蛋通常亦係最快最穩定, 同100% 成個日本不論地點都一定work.  而且一定係最低ping 同出日本IP.  呢個世界無free lunch 嘅.

 

Band 19 同 Band 18 嘅問題

最後一樣要注意既係, 日本有4大網路商, Docomo , Softbank,  AU Kddi 同埋楽天Mobile.  佢地行嘅頻譜 (band) 都唔同.  你係香港買嘅手機唔一定會支援個個頻譜, 呢個公開嘅事實, 大部份賣卡俾你嘅人都唔會同你講.   亦所以點解你唔知頭唔知路買張你手機唔support 嘅日本卡嘅話, 接收差係必然.

 

Docomo 係最大間, 你可以當為香港嘅CSL.  所以香港買到既卡, 9成都係Docomo 卡.  最大既問題係, Docomo 用既band, 有2個band, 係香港好多既Android 手機都唔支援.  下面就係日本各網路商用既band. 紅色圈係代表主要用到嘅頻道.

 

 

首先講Docomo 似香港CSL, In general, 北海道郊區同沖繩郊區用docomo 係通常係會收得好過其餘3間 既.  除左上面2個比較特別既地方之外, 你去其他大city 或者黐住JR 線玩的話, Docomo 同其他3大網路商都係無分別.  係真係你要去到郊區, 無地鐵站到,  甚至山區, docomo先會有d咁多差別.  反而你部手機係咪support 需要既band 會重要好多好多.  乜野叫做你部手機有無support 需要既band?  其實每部手機可以收到既4G/5G “band” 都唔同.  香港買既手機自然會收到晒香港用既4G “band”.  但係日本唔同既電話網路商用既”band” 都同香港好唔同, 咁就要睇下你部手機係咪”啱channel”.  你唔啱band當然會無訊號.    

 

Docomo 用既4G band 係 1, 3, 19, 21.  而band 1, 3, 19 係用得最多.  日本市區主要用band 1, 3.  而郊區係主要用Band 19.   以Android 成千上萬個model, 只有少部份既model 有support band 19.  而 iPhone 6 以上既model 就已經support band 19. 當如果你行程係會到郊外, 你手機又唔support band 19, 而去既地點得band 19 cover 個度的話,   你係好大機會係會無訊號.   所以你揀Docomo 卡既話, 你要知道你係唔係去郊區地方.  如果你去郊區既話, check 下你部手機有無support band 19 點先為之叫做郊外?  下面網站可以check 每個日本地區用乜野band 為主.   Band 19 only 既地方會係用紫色黎表示.  https://www.nttdocomo.co.jp/area/  好似下圖指住個d 紫色既地方就係只有band 19 cover.  你手機無band 19 support 而去個d 地方就必定斷線.

 

 

Softbank 就似香港嘅Smartone.  佢對大部份嘅香港手機都支援最好.  佢行4G band 1,3,8.  不論香港嘅iphone 同android 機都實會有support.  而佢係日本嘅幅蓋度差不多同Docomo 同級.   所以香港人大部份一係買Docomo 卡, 一係就Softbank 嘅卡.    而KDDI Au  可以當係香港嘅3HK 咁, 幅蓋都唔差嘅.  佢係用4G band 1, 3, 18.  你係香港買嘅3HK 日本上網卡, 都係咁啱去到日本會行KDDI AU 嘅.    不過問題係好多android 機係無band 18.  因為KDDI AU行band 18,  An 機最好就唔好買用KDDI AU 嘅sim 卡 (好似3HK 個張就係).  最後Rakuten Mobile 楽天モバイル 就可以當做香港嘅中移動咁.  佢係4間最細, 市區無問題, 不過郊區明顯係收得差d 嘅.  Rakuten mobile 係用4G band 3, 18.  因為Band 18 香港嘅An 機大部份都無, 亦即係對Android 機唔會太友善啦.  最後, 全日本嘅5G band 係用N77, N78 同N79.  現時有好幾張日本旅遊sim 都有support 5G.  你要睇番上表, 黎再對番你部手機有無支援佢要嘅5G band 啦.  好似Docomo 5G 咁計, 你睇上面個表見到, 佢係要晒N77, N78 同N79.  係日本用 iphone 不論4G 定係5G 都係支援較好嘅, 因為 iphone 差唔多4大網路商用到嘅band 都有齊.  而日本係極度歧視唔係日版嘅Android 機.  所以, 你用An 機嘅話你必需要check 你部機有無support 你買個張卡要用嘅band.  否則, 必定斷線.

 

咁我可以點樣查部手機support 乜野band?   你可以係 http://www.gsmarena.com/search.php3? 搵到你部手機support 咩band.  當你搜索到你部電話, 就可以好似下圖個位置見到佢有咩band.  以下面呢部電話黎講, 係support band 1,2,3,4,5,7,8,17,20.   係無band 19 support.

 

所以你問我既話, 你如果用Android 機又唔知你部機有無Band 19/18的話, 買番Softbank 網路既卡.  Softbank 既網路既卡, 香港d 電話係一定support 無問題.   用Docomo/KDDI AU 卡係真係要夾電話.  有d 大陸電話係直頭用唔到Docomo 卡.

.

 

Sim 卡建議

一般選擇: (現時好多似樣嘅卡都包好多日, 所以你去8日都係會揀個d 卡)

無限data 選擇

  • 2024年我暫時唔見有真正無限data 嘅, 多data 選擇嘅 (50GB+) 就日本wifi 蛋就一隻係Galaxy 5G wifi.  另一隻就係Docomo 5G U50.  現時無見過有sim 卡係有真無限data.

多人而需要無限data 既選擇

  • 係日本租隻無限data 既 4G wifi 蛋.  550 yen 一日.   跟住, 求其搵d $80蚊最平既sim卡, 買人頭減1張.   Total 即係1隻日系wifi 蛋 + 人頭減一張既平價sim 卡, 加埋既錢除咁多份人就係每個人要俾既錢. (如果5個人去, 即係租1隻蛋 + 4張sim)  咁樣做法既話, 所有人一齊個陣就駁上隻無限data wifi 蛋. 分開行個陣都有d 平價sim 頂一頂send 到whatsapp.  可以睇下關於日本Wifi 蛋 既資料.

自己唔知部手機有無support band 19/18 或唔知有無support Docomo 卡/KDDI Au 卡既選擇

  • 正如上面講, 你如果部手機係無support band 19/18, 而又要去郊區既話, 你係好大機會跌落3G 甚至係無訊號.  你唔知你部手機有無support 既話, 最保險係買 Softbank 5G日本上網卡 (本地卡行Softbank), 或者自由鳥 (Softbank) $15蚊一日.    AirSim (Docomo/Softbank) $18蚊一日,  或者 AIS Sim2fly 6GB 8日上網卡 (Softbank). 因為呢幾張用Softbank 個network.  大部份香港手機都support 佢地用既band 1, 3, 8.

所有呢d 上網卡, 其實最齊係一定係深水埗鴨寮街.   我會建議係有舖頭嘅地方買, 或者係有信籲嘅網店買, 好似 KKday,  Klook, mypacemarket.com, datasimstore.com, 超譯網店, 或者逆風sim 網店.   另一個方法就係759 阿信屋買自由鳥.

 

想知道更多唔同Sim 卡既speedtest 效能, 推呢頁上頂揀主頁.   去我地  Facebook專頁  或者係LIHKG.com旅遊台搵主貼 “[先睇頭post 再發問] 日本上網卡 Wifi 蛋 懶人包“, 都可以搵到我地既討論.

本站係需要你地既回報, 只有越多人report, 呢度既資料先會越準確.  所以, 係你去旅行之前, 請先download 呢個app.

iPhone

https://itunes.apple.com/hk/app/speedtest.net-speed-test/id300704847?l=zh&mt=8

Android

https://play.google.com/store/apps/details?id=org.zwanoo.android.speedtest&hl=zh_TW

去到當地市區 (非機場), run 個app 一次, 跟住screenshot 左個速度.  記低 run 個app 個陣既地點. 測試時間最好係當地時間1pm – 8pm.  因為晨早或深夜速度實快, 測黎都無意義.  

4.8 21 votes
Article Rating
Subscribe
Notify of
guest

0 Comments
Inline Feedbacks
View all comments
0
Would love your thoughts, please comment.x
()
x